Khotbah Kejadian 15: 1 - 6 Berserah Kepada Rencana Tuhan

 Minggu Reminiscere; 13 Maret 2022

15:1 Kemudian datanglah firman TUHAN kepada Abram dalam suatu penglihatan: "Janganlah takut, Abram, Akulah perisaimu; upahmu akan sangat besar."

15:2 Abram menjawab: "Ya Tuhan ALLAH, apakah yang akan Engkau berikan kepadaku, karena aku akan meninggal dengan tidak mempunyai anak, dan yang akan mewarisi rumahku ialah Eliezer, orang Damsyik itu."

15:3 Lagi kata Abram: "Engkau tidak memberikan kepadaku keturunan, sehingga seorang hambaku nanti menjadi ahli warisku."

15:4 Tetapi datanglah firman TUHAN kepadanya, demikian: "Orang ini tidak akan menjadi ahli warismu, melainkan anak kandungmu, dialah yang akan menjadi ahli warismu."

15:5 Lalu TUHAN membawa Abram ke luar serta berfirman: "Coba lihat ke langit, hitunglah bintang-bintang, jika engkau dapat menghitungnya." Maka firman-Nya kepadanya: "Demikianlah banyaknya nanti keturunanmu."

15:6 Lalu percayalah Abram kepada TUHAN, maka TUHAN memperhitungkan hal itu kepadanya sebagai kebenaran.

Ndang sala marpangidoan molo adong na hinirim ni rohanta, boi do pasahatonta tu manang ise na tatanda. Isara ni sahalak ianakhon di tongatonga ni jabu, jotjot do pasahathon pangidoanna tu natorasna. Nda tung tu halak ibana mangido pangidoanna, tontu tu natoras na sandiri. Alai nang do botoon ni dakdanak i paboa saguru di natoras i do pangidoanna i. Dioloi manang ndang. Sasintongna ndang boi paksaonna natoras i asa dilehon pangidoanna i. Alai nuaeng on, nunga gumodang anakhon mamaksa natorasna asa dioloi pangidoanna. On do na jotjot masa di ngolu ni keluarga, ala so dioloi natorasna pangidoanna ujungna mardandi ma ibana. Sada tudosan do on laho mangantusi jamitanta sadari on. I ma taringot naung leleng dipaima si Abram parianakhonon sian Debata, alai ndang gabe mardandi ibana tu Debata. Dung pe di hatutuana asa dilehon Debata i tu ibana pangidoanna i. Ganjang do barita ni si Abram di taringoti di buku nabadia i, ndada holan di Padan Narobi alai dohot do nang di Padan Naimbaru. Sude angka na masa tu si Abram paingothon hita taringot hasatiaon ni Debata tu jolma na tongtong do diingot Debata angka naung dibagabagahon.

Hata parjolo na pinasahat ni Jahowa i ma "unang ho mabiar ale Abraham". aha do na patubu biar diroha ni si Abram? Boi do mungkin dipingkiri ibana boha ngoluna tu jolo dung ditaluhon ibana raja Kedor-Laomor, tontu managam do ibana tu pamaloson. Diboto ibana do tong hagogoon ni raja i na mansai di habiari angka harajaon di na humaliangna. Alani i sian surasura ni hajolmaon boi do mamboan lomos ni roha i tu jolo. Na parjolo i ma boi do tubu biar i ala dirimangrimangi ngoluna na mansai holang na masa di dirina tu na niuarihon ni Debata.Andorang dijou Jahowa ibana bungkas sian Ur tu tano na naeng sipatuduhononNa, dibagabagahon Debata do bahe-nonna tu ibana gabe bangso na bolon jala pabalgaonna goarna asa gabe pasupasu. Hape molo dipaumbuk ibana tu dirina hira andul do sian na adong di dirina di uju i. Nunga sampulu taon dung di jalo ibana bagabaga i hape ndang adong nanggo tanda hagabeon di nasida. Tarlumobi ma i di hasomalan ni hajolmaon ndang adong be si hirimonna tu na songon i.  Ai ndang holan gogona na sumurut dohot do parbue ni sinondukna na so jumpang be. Alani molo dihajolmaon dang salah be di rohanta molo tung mabiar jala mandele si Abram. Gabe dirajumi ai Abram na ma si Eliser anak ni naposona na tubu di bagasna gabe sitean saluhutna na niuarihon ni Jahowa tu ibana.

Dipapuas si Abram do saluhut na solot di rohana di turpukta on. Ndang adong na di tabunihon ibana manang ndang marsipalensem (pura-pura) dirina di jolo ni Jahowa. Alai bulus do rohana pasahathon pangarajumionna di ngoluna, paboa atik pe godang na jinalona sian Jahowa arta dohot naposona alai hira na punjung do dihilala ngoluna ala so adong dipalumehon Debata pinompar di ibana. Disialani hira so adong marlapatan dirajumi roha hajongjonganna di tano on.

Dipatuduhon do di turpuk on harosuon dohot haulion (romantisme) parsaoran ni Debata tu si Abram. Di papos Debata ma roha ni si Abram. Ditogihon Jahowa manatap bintang di langit songon tanda ma i tu si Abram paboa na sintong do Debata di sude naung ni uarihon ni Debata tu hagasan ngoluna. Manatap bintang gabe sada parningotan ma i di ibana di hatigoran ni Debata. Bilangan ni bintang di langit dohot mamilangi pasir di topi ni laut sada pandohan simbolis do i nang i paboahon batas ni pangantusion ni jolma na so tuk mandodo dohot mamilangi pambahenan ni Debata dingolu on.

Tigor ala ni haporseaon, i do unok ni pangajarion protestan na tajalo. Ndang ala ni ulaonta jala ndang ala ni hasatiaon dohot haunduhonta tu Debata umbahen na tigor ngolunta, alai asiniroha ni Debata do i marhite haporseaon na tajalo. Na naeng berengonta disi ndang pangajarion na marharoroan sian pingkiran ni Marthin Luther sambing pangajarion i alai na marhaojahan sian hata ni Debata do pandohan i. Somalna di halak Jahudi suhatsuhat ni hatigoran holan marhite patik i do di rajumi roha nasida. Alai di turpuk on ndang dilehon Debata dope patik i tu si Musa. Sian bonana pe nunga di patuduhon Jahowa ndang ulaon dohot haunduhon ni jolma tu patik ojahan ni haluaonta alai asi ni roha ni Debata do marhite haporseaon do.

Tutu maralus do pangidoan ni si Abram di pudian ni ari. Gabe dilehon Debata ma tu ibana anak gabe panean di pudian ni ari. Tongtong dibahen si Abram komunikasi na denggan tu Debata di sude pardalanan ni ngoluna mangadopi angka na masa i. Tongtong mangolu dibagasan panghirimon dohot haporseaon na marsitutu tu Debata nang pe ndang saut dope bagabaga ni Debata di ngoluna. Haporseaon na songon i na naeng jumpang di halak Kristen di partingkian nuaeng. Marnangkok tuat do ngolu haporseaon ni jolma di tano on. Molo uju nangkok haporseaon jala timbo tarida habaranion, hasatiaon dohot ngolu panghophopon di bagasan dirinta na nionjar ni ngolu na sian Debata, alai molo sumurut haporseaon soluk ma ngolu na di bagasan biar, lomos ni roha dohot pandelean gabe haholomon manghuphupi roha nang pingkiranta. Gabe tapasobok hadirionta tu angka na boi taantusi dohot naboi taula, dang tu huaso dohot hagogoon ni Debata. Olo marsomba tu Debata na satia i, parholong roha jala pardenggan basa i. Pasahaton ni Debata ma tu hita na tapangido i molo jumpang tongtong haporseaon. Alai tong ma ingotonta tung saguru di lomo ni roha ni Debata do sude pangidoanta. Alani ingkon mangolu dibagasan hasabaron do hita tongtong paimahonsa. Manang sadihari pe dibuhul Debata pasahathon pangidoanta i tung saguru di Ibana do sude. Unang hatophatop ganggu rohanta molo so pintor jumpang na tasangkapi. Ai hasabaron i do sada sinjata laho patoguhon haporseaonta tu Debata. Sandok marpos ni roha tu Debata parasiroha jala pardenggan basa i ma hita di ngolunta on.